கோவையில் இஸ்லாமிய பாட சாலையின் கதவை உடைத்து விலை உயர்ந்த லேப்டாப் திருட்டு - இருவரை கைது செய்த காவல்துறை !!!

கோவையில் இஸ்லாமிய பாட சாலையின் கதவை உடைத்து விலை உயர்ந்த லேப்டாப் திருட்டு - இருவரை கைது செய்த காவல்துறை !!! 

கோவை, மேட்டுப்பாளையத்தை அடுத்து உள்ள காரமடை வெண்மணி நகர் பகுதியில் இஸ்லாமிய பாட சாலை இயங்கி வருகிறது. இங்கு காரமடை குட்டையூர் பகுதியைச் சேர்ந்த முகமது நிவாஸ் (27) என்பவர் நிர்வாகி மற்றும் பொறுப்பாளராக இருந்து வருகிறார். 

இந்நிலையில் இவர் கடந்த 8 ஆம் தேதியன்று இரவு பாட சாலையை மூடி விட்டு வீட்டிற்கு சென்று உள்ளார். பின்னர், மறுநாள் சென்று பார்க்கும் போது பாட சாலையின் முன்பக்க கதவு உடைக்கப்பட்டு உள்ளே வைக்கப்பட்டு இருந்த விலை உயர்ந்த லேப்டாப் திருடு போனது தெரிய வந்தது. 

பின்னர், இதுகுறித்து முகமது நிவாஸ் அளித்த புகாரின் பேரில் காரமடை காவல் ஆய்வாளர் ஞானசேகரன் தலைமையிலான போலீசார் வழக்குப் பதிவு செய்து விசாரணை மேற்கொண்டனர். மேலும், பாட சாலையில் பொருத்தப்பட்டு இருந்த சி.சி.டி.வி காட்சிகளை ஆய்வு செய்ததில் இருவர் பாட சாலையின் முன்பக்க கதவை உடைத்து உள்ளே வைக்கப்பட்டு இருந்த லேப்டாப்பை திருடி செல்வது தெரிய வந்தது.

விசாரணை சென்று கொண்டு இருக்கும் நிலையில் நேற்று காரமடை - மேட்டுப்பாளையம் சாலையில் உள்ள டாஸ்மாக் கடையில் அந்த நபர்கள் இருப்பதாக போலீசாருக்கு தகவல் வந்து உள்ளது. விரைந்து சென்ற போலீசார் இருவரையும் பிடித்து வந்து காவல் நிலையத்தில் விசாரணை மேற்கொண்டனர்.

விசாரணையில் அவர்கள் ஊட்டியைச் சேர்ந்த மணிகண்டன் (29), மத்தம்பாளையம் பகுதியைச் சேர்ந்த கார்த்திக் (47) என்பதும், இஸ்லாமிய பாட சாலையின் கதவை உடைத்து லேப் டாப்பை திருடியதும் தெரிய வந்தது. இதனை அடுத்து அவர்களை கைது செய்த போலீசார் அவர்களிடம் இருந்து லேப்டாப்பை பறிமுதல் செய்தனர்.

பின்னர், அவர்களை நீதிமன்றத்தில் ஆஜர்படுத்தி சிறையில் அடைத்தனர்.